दोलखाको गौरीशंकरमा बलेरो दुर्घटना हुँदा ४ जना घाइते

दोलखा । गौरीशंकरमा बलेरो दुर्घटना हुदाँ ४ जना घाइते भएको छ । शुक्रबार साँझ करिब ५ बजेतिर गौरीशंकर गाउँपालिका–९, टासीनाम जाने ग्रामीण सडक खण्ड  अन्तर्गत गोठखर्क नजिकै बलेरो दुर्घटना हुदाँ ४ जना यात्रु घाइते भएको हो ।

जगतबाट टासीनामका लागि छुटेको १७७७ नम्बरको बलेरो जगत–टासीनाम ग्रामीण सडक खण्ड अन्तर्गत उकालो कच्ची बाटोका घुम्तीमा ब्रेक फेल भई दुर्घटना भएको थियो । दुर्घटनामा परी बलेरोमा सवार पाँच जना मध्ये चार जना यात्रु घाइते भएका छन् ।

दुर्घटनामा गौरीशंकर गाउपालिका-९ टासीनामका स्थानीय तेन्जी शेर्पा, छौंवा शेर्पा, निमछिरी शेर्पा र निमलाक्पा शेर्पा घाइते भएको टासीनाम आधारभुत विद्यालयका शिक्षक यम कुमार श्रेष्ठले जानकारी दिए । श्रेष्ठका अनुसार घाइतेहरुलाई उद्धार गरी उपचारका लागि सिंगटी पठाएको बताए ।

बलेरो फेदीबाट सिधै माथि भिरको उकालोमा अप्ठ्यारो र साँघुरो कच्ची बाटो भएको घुम्तीमा टर्निङ्ग नपुगी व्याक गर्ने क्रममा ब्रेकफेल भई सडकमै पल्टेको थियो । बलेरो जगतबाट टासीनामका लागि पाँच जना यात्रु र सामान लिएर छुटेको थियो ।