एमालेबाट निलम्बित भए मानव तस्करीको आरोप लागेका मन्त्री अधिकारी

काठमाडौँ । नेकपा एमालेले कोशी प्रदेशका निवर्तमान आन्तरिक मामिला तथा कानून मन्त्री लिलाबल्लभ अधिकारीलाई निलम्बन गरेको छ । पार्टीको अनुमतिबिना जापान गएका मन्त्री अधिकारीमाथि थप अनुसन्धान गर्न नेकपा एमाले कोशी प्रदेशले गम्भीर चासो राख्दै उनलाई निलम्बन गरेको हो ।

अधिकारीलाई मानव तस्करीको आरोपको अन्तिम निरुपण नभएसम्मका लागि पार्टीको कुनै पनि तहमा रहन नपाउने गरि निलम्बन गरिएको नेकपा एमाले कोशी प्रदेश अध्यक्ष घनश्याम खतिवडाले जानकारी दिनुभयो ।

अधिकारीको जापान भ्रमण विवादित वन्नुका साथै मानव तस्करीको आरोप समेत लागेको छ । यद्धपी सो आरोप लगत्तै अधिकारीले मन्त्री र पार्टी संसदीय दलको नेताबाट समेत राजिनामा दिईसकेका छन् ।

बुधबार मन्त्री अधिकारीले प्रदेश सरकार, पार्टीको बढ्दो आलोचना र दबाबबीच पदबाट राजीनामा दिएका थिए । अधिकारी प्रदेश मन्त्रिपरिषद् र संघीय सरकारसँग अनुमति नलिई जापान भ्रमणमा गएपछि उनीमाथि मानव तस्करीको आरोपमा प्रहरीले छानविन गर्ने तयारी गरिरहेका बेला पार्टीले निलम्बन गरेको छ ।

मन्त्री अधिकारीमाथि आफ्नो पदको दुरुपयोग गरी गैरकानूनी रूपमा मानिसहरूलाई जापान पुर्‍याउन खोजेको आरोप छ । अधिकारीसँगै जापान पुगेका खोटाङका दावा शेर्पा, जनक राई, र रसुवाका कञ्चन देवकोटालाई जापानको अध्यागमन विभागद्वारा डिपोर्ट गरिएको थियो ।