दोलखा । देशभर स्थानीय तहको उपनिर्वाचन सुरु भएको छ । उपनिर्वाचनको मतदान आज बिहान ७ बजेदखि साँझ ५ बजेसम्म हुनेछ ।
आज देशभर नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ गरी ४१ पदका लागि उपनिर्वाचन हुन लागेको हो ।
निर्वाचन आयोगका अनुसार उपनिर्वाचनमा २० राजनीतिक दलका र स्वतन्त्रसमेत गरेर ३ सय ७६ जना उम्मेदवार चुनावी मैदानमा रहेका छन् । आज हुने उपनिर्वाचनमा २ लाख २६ हजार ७ सय ९९ मतदाता सहभागी हुने आयोगले जनाएको छ ।
उपनिर्वाचनका लागि कुल १ सय ६२ मतदानस्थलमा २ सय ९३ मतदान केन्द्र बनाइएको छ । मतदानको लागि सरकारी मान्यता प्राप्त परिचयपत्र लिएर मतदान केन्द्रमा लैजानु पर्नेछ ।
त्यसैगरी, मतदाता परिचयपत्र नरहे परिचय खुल्ने नागरिकता, राष्ट्रिय परिचयपत्र, सवारी चालक परिचयपत्र, राहदानी वा स्थायी लेखा नम्बर भएको परिचयपत्रका आधारमा मतदान गर्न सकिनेछ ।
आज निर्वाचन हुने सम्बन्धित स्थानीय तहमा सरकारले सार्वजनिक बिदा दिएको छ ।