गुरुङ समुदायले मनाए तमू ल्होसार, सस्कृतिले ढाकियो टुँडिखेल

काठमाडौं । गुरुङ समुदायले नयाँ वर्षलाई स्वागत गर्दै आज तमू ल्होसार मनाएको छ । यस वर्ष गुरुङ समुदायले मुप्री ल्हो (गरुड वर्ग) लाई विदाई गर्दै सप्री ल्हो (सर्प वर्ग) लाई स्वगत गरी नयाँ वर्ष अर्थात ल्होसार पर्व मनाएको हो ।

तमू ल्होसार गुरुङ समुदायले नयाँ वर्षका रुपमा देश तथा विदेशमा भव्यरुपमा मनाउने गर्छन् । ‘ल्हो’को अर्थ वर्ष र ‘सार’ को अर्थ फेरिनु भएकाले वर्ष फेरिने दिनलाई ‘तमु ल्होसार’ भनिएको हो ।

‘तमू ल्होसार’ पर्व सूर्यको किरणसँग सम्बन्धित छ । गुरूङ बाहुल्यता रहेको लमजुङ, गोरखा, तनहुँ, स्याङ्जा, मनाङ, कास्की, पर्वतलगायतमा सूर्यको ताप पहिले आउने भएकाले पुस १५ मा यो पर्व मनाउने गरिएको किम्वदन्ती छ ।

पुस १५ गतेको रात सबैभन्दा लामो हुने र यसपछिका रात घट्दै जाने भएकाले पनि यस पर्वको महत्व रहेको बताइन्छ । यसपछि क्रमशः तामाङ र शेर्पा जातिको बसोवास भएको क्षेत्रमा सूर्यको ताप आउने भएकाले माघ र फागुनमा ल्होसार पर्व मनाइने गरिन्छ ।

तमु ल्होसारका अवसरमा आज सरकारले सार्वजनिक बिदा दिएको छ । यस अवसरमा टुँडिखेलमा गुरुङ समुदायले विशेष साँस्कृतिक र शुभकामना आदनप्रदानको औपचारिक कार्यक्रम आयोजना गरेको थियो ।

तमू ल्होसार मुल आयोजक समितिले हरेक वर्ष सरकार प्रमुखको आथित्यतामा ल्होसारको औपचारिक उद्धघाटन र सम्बोधन गर्नु हुन्थ्यो भने यसवर्ष उपप्रधान तथा सहरी विकास मन्त्री प्रकासमान सिंहको प्रमुख अतिथ्यतामा औपचारिक कार्यक्रम सम्पन्न गरेको हो ।