आज गाईजात्रा, उपत्यकामा सार्वजनिक विदा

काठमाडौं, २६ साउन — आज काठमाडौं उपत्यका लगायत नेपालभर गाईजात्रा पर्व धूमधामका साथ मनाइँदैछ। मृतकको सम्झनामा आफन्तले गाई वा गाईको स्वरूपमा सजाइएका व्यक्तिहरूको सहभागिता हुने यो पर्वमा राजधानीका विभिन्न ठाउँमा रंगीचंगी झाँकी, नाचगान र व्यङ्ग्यात्मक प्रस्तुति देखाइन्छ ।

पौराणिक मान्यताअनुसार, मृतक आत्माको सद्गति र परिवारको दुःख कम गर्न गाईजात्रा मनाइने चलन रहिआएको छ । विशेष गरी नेवार समुदायमा यो पर्वको सांस्कृतिक, धार्मिक र सामाजिक महत्व अत्यधिक छ।

उपत्यकाको काठमाडौं, ललितपुर र भक्तपुरमा स्थानीय सरकारले सार्वजनिक विदा दिएको छ। विहानैदेखि दरबार स्क्वायर, गल्ली–टोलहरूमा भीडभाड बढेको छ भने पर्यटकहरू पनि उत्सव अवलोकन गर्न आकर्षित भएका छन्।

यस अवसरमा कलाकारहरूले व्यङ्ग्य, हास्य–व्यंग्य कार्यक्रम प्रस्तुत गर्दै समाजका विकृति–विसङ्गतिप्रति जनचेतना जगाउने परम्परा पनि रहिआएको छ।