प्राध्यापक स्व. सन्तबहादुर गुरुङको १६औँ स्मृति दिवस सम्पन्न

काठमाडौं । तमू समुदायका अग्रज, शिक्षाविद् तथा समाजसेवी प्राध्यापक स्व. सन्तबहादुर गुरुङको १६औँ स्मृति दिवस श्रद्धापूर्वक सम्पन्न गरिएको छ । तमू ह्युल छोंज धीँ गुरुङ राष्ट्रिय परिषद्, काठमाडौंको आयोजनामा सम्पन्न स्मृति सभा नौथुम तमु समाज, काठमाडौंले व्यवस्थापन गरेको थियो ।

कार्यक्रममा स्व. गुरुङको तस्बिरमा माल्यार्पण गर्दै उहाँप्रति श्रद्धाञ्जली अर्पण गरे । स्व. गुरुङ तमू ह्युल छोंज धीँ गुरुङ राष्ट्रिय परिषकाा संस्थापक अध्यक्ष समेत हुन् ।

कार्यक्रममा उहाँलाई तमू ह्युल छोंज धीँ गुरुङ राष्ट्रिय परिषद्का संस्थापक अध्यक्ष भएका हुनाले हरेक वर्ष उनको स्मृतिमा स्मृति दिवस मनाउने गरिन्छ । कार्यक्रममा सहभागीहरूले भाषा, संस्कृति र परम्पराको संरक्षणमा उहाँले देखाउनुभएको नेतृत्व र योगदानलाई उच्च मूल्याङ्कन गरे ।

काठमाडौं उपत्यकाभित्रका विभिन्न तमू संघसंस्था, परिवारजन, समाजसेवी तथा समुदायप्रेमी व्यक्तिहरूको उल्लेखनीय उपस्थिति रहेको स्मृति सभामा सहभागीहरूले उहाँको जीवनयात्राबाट सिक्नुपर्ने प्रेरणाबारे धारणा राखे ।

परिषद्का केन्द्रीय अध्यक्ष धनमान गुरुङले उनको योगदानबारे विस्तृत चर्चा गर्दै उहाँले तमू समुदायको जागरण र नेपाली समाजमा शिक्षा, संस्कृति र संगठन निर्माणमा ऐतिहासिक योगदान गरेको बताउनुभयो । उहाँका अनुसार, स्व. गुरुङले सामुदायिक एकता र सांस्कृतिक गौरवलाई जीवनपर्यन्त प्राथमिकता दिए ।

त्यस्तै, संस्थाको महासचिव राजु गुरुङले स्मृति दिवसको उद्देश्य र लक्ष्य स्पष्ट पार्दै स्मृति दिवसले स्व. गुरुङको अपूर्ण सपना पूरा गर्ने संकल्पलाई बल पुर्‍याउने बताउनुभयो । उहाँले स्मृति दिवसलाई केवल औपचारिकता नभई, उहाँका विचार र मूल्य–मान्यतालाई नयाँ पुस्तामा प्रवाहित गर्ने अभियानको निरन्तरता भएको प्रस्ट पार्नुभयो ।

कार्यक्रममा परिवारजनले उहाँप्रति भावपूर्ण श्रद्धाञ्जली अर्पण गर्दै समाज र समुदायको हितमा उहाँले आरम्भ गर्नुभएको यात्रालाई निरन्तरता दिने प्रतिबद्धता व्यक्त गरे । अन्य वक्ताहरूले उहाँलाई शिक्षक मात्र नभई सांस्कृतिक अभियन्ता र संगठन निर्माणकर्ताका रूपमा व्याख्या गरे ।

स्मृति दिवसले प्राध्यापक स्व. सन्तबहादुर गुरुङको जीवन योगदानलाई मात्र सम्झाएको छैन, बरु तमू समुदायमा सांस्कृतिक पहिचान, शैक्षिक चेतना र संगठनात्मक एकतालाई मजबुत पार्ने साझा संकल्पलाई बलियो बनाएको छ । आयोजक संस्थाहरूले आगामी दिनमा पनि स्मृति दिवसलाई परम्परागत रूपमा मात्र नभई नयाँ व्यवहारिक गतिविधि र अभियानमार्फत निरन्तरता दिने प्रतिबद्धता जनाएका छन् ।