नेपाल उपविजेतामै सिमित, महिला च्याम्पियनसिपको उपाधि म्यानमारलाई

काठमाडौं । महिला च्याम्पियनसिपको उपाधि म्यानमारले जितेको छ । त्रिपुरेश्वरस्थित दशरथ रंगशालमा भएको खेलमा म्यानमारले नेपाललाई २–० गोलले पराजित गर्दै उपाधि जितेको हो ।

पहिलो हाफ गोलरहित बराबरीमा सकिँदा खेलको दोस्रो हाफमा म्यानमारले २ गोल गर्दै नेपाललाई घरेलु मैदानमा स्तब्ध पारेको हो । यो हारसँगै नेपाल १३औं फाइनलमा पनि रजतमा मात्र सीमित भएको छ ।

बुधबार भएको खेलको पहिलो हाफ गोलरहित बराबरीमा सकिए पनि दोस्रो हाफको दुई मिनेटको अन्तरमा दुई गोल खाएको थियो । खेलको ६२ मिनेटमा म्यानमारले अग्रता लिएको थियो । म्यानमारका लागि नो पो खिनले गोल गर्दै दशरथ रंगशालामा उपस्थित घरेलु दर्शकलाई स्तब्ध पारिन् ।

दुई मिनेटपछि म्यानमारले अग्रता दोब्बर पार्‍यो । म्यानमारकी कप्तान विन तुनले डिबक्स नजिकबाट हानेको प्रहार नेपालकी गोलकिपर एन्जिला तुम्बापो सुब्बाको खुट्टामा लागेर गोल भयो । नेपालकी डिफेन्डर गीता रानाले एन्जिलाको खुट्टाबाट फुत्किएको बल रोक्ने प्रयास गरे पनि सफल हुन सकिनन् ।

नेपाल र म्यानमार दुवैले लिग चरणमा लेबनान र किर्गिस्तानलाई पराजित गरेर फाइनलमा स्थान बनाएका थिए । नेपालले चार देशीय अन्तर्राष्ट्रिय महिला च्याम्पियनसिप यो प्रतियोगिता महिला एसिया कप र फिफा विश्वकप छनोटको तयारीका लागि आयोजना गरेको हो ।

त्यसैगरी, आगामी जुनमा नेपालले छनोट खेल्दैछ। छनोटको समूहमा शीर्ष बन्न सके नेपाल एएफसी वुमन्स एसिया कपमा छनोट हुनेछ।