१
Advertisement
काठमाडौं । नेपाल सरकार आदिवासी जनजाति उत्थान राष्ट्रिय प्रतिष्ठानद्वारा गत वर्ष प्रकाशन गरिएका महत्वपूर्ण पुस्तकहरूको विमोचन समारोह सञ्चार तथा सूचना प्रविधि मन्त्री पृथ्वीसुब्बा गुरुङको प्रमुख आतिथ्यतामा सम्पन्न भयो ।
समारोहमा प्रतिष्ठानका उपाध्यक्ष रेशम गुरुङले स्वागत मन्तव्य व्यक्त गर्नुहुदै आदिवासी जनजाति समुदायको भाषा, संस्कृति, इतिहास र पहिचान संरक्षणमा प्रतिष्ठानले गर्दै आएको योगदानबारे प्रकाश पार्नुभयो । उनले विगत वर्षमा प्रतिष्ठानले प्रकाशन गरेका पुस्तकहरू केवल साहित्यिक वा शैक्षिक सामग्री मात्र नभई आदिवासी जनजाति समुदायको अस्तित्व र गौरवलाई प्रस्ट पार्ने महत्वपूर्ण दस्तावेज भएको उल्लेख गर्नुभयो ।
कार्यक्रममा उपाध्यक्ष गुरुङले आदिवासी जनजाति प्रतिष्ठानले आदिवासीका विषयमा अध्ययन गर्ने मात्रै नभएर आदिवासी जनजातिको हक हितलाई सुरक्षित राख्ने अभिन्न अङ्ग रहेको बताउनुभयो । उहाँका अनुसार पछिल्लो समय राज्यका नेतृत्वकर्ताबाटै पटक पटक प्रतिष्ठान आवश्यक छैन भन्दै आलोचना गर्नु आदिवासीको समस्याप्रति संवेदनशील नभएको प्रष्ट हुने बताउनुभयो ।
प्रमुख अतिथि मन्त्री पृथ्वीसुब्बा गुरुङले पुस्तक विमोचन गर्दै आदिवासी जनजाति समुदायको पहिचान, अधिकार र उत्थानका सवालमा सरकार गम्भीर रहेको बताउनुभयो । उनले आदिवासी जनजाति आयोग र प्रतिष्ठानबीचको कार्यसम्पादन र समन्वयलाई अझ प्रभावकारी बनाउनुपर्ने आवश्यकता औंल्याउँदै, प्रकाशन कार्यले नीति निर्माणदेखि शैक्षिक अनुसन्धानसम्ममा टेवा पुग्ने विश्वास व्यक्त गर्नुभयो ।
मन्त्री गुरुङले आदिवासी जनजातिहरूको भाषा, संस्कृति, कला र मौलिक ज्ञान प्रणालीलाई पुस्तौंदेखि पुस्तासम्म जोगाइराख्न सरकारी संरचना मात्र नभई समुदायको पनि बराबरको भूमिका रहने बताए । उनले प्रकाशित पुस्तकहरूले भावी पुस्तालाई आफ्नो इतिहास र पहिचान बुझ्न सहज बनाउने उल्लेख गरे ।
कार्यक्रममा प्रतिष्ठानका पदाधिकारी, लेखक, विज्ञ, अनुसन्धानकर्ता तथा विभिन्न आदिवासी जनजाति समुदायका प्रतिनिधिहरूको उपस्थिति थियो । सहभागीहरूले पुस्तक विमोचनलाई आदिवासी जनजाति समुदायसँग सम्बन्धित विषयमा अध्ययन, अनुसन्धान र ज्ञान विस्तारको सशक्त प्रयासका रूपमा मूल्यांकन गरेका थिए ।
फोटो-फिचर
