अनेरास्ववियुको केन्द्रीय सचिवमा दोलखाका दिलिप खड्काको दाबी

काठमाडौं, जेठ २५ – अनेरास्ववियु (अखिल नेपाल राष्ट्रिय स्वतन्त्र विद्यार्थी युनियन) को २४औं राष्ट्रिय महाधिवेशन आइतबारदेखि काठमाडौंमा सुरु भएको छ ।

यस महाधिवेशनले संगठनको आगामी नेतृत्व चयन गर्ने तयारी गरिरहेको छ । जसमा दोलखाबाट प्रतिनिधित्व गर्दै आएका विद्यार्थी नेता दिलिप खड्काले केन्द्रीय सचिव पदमा आफ्नो उम्मेदवारीको औपचारिक दाबी गरेका छन् ।

दोलखाबाट लामो समयदेखि विद्यार्थी राजनीतिमा सक्रिय रहँदै आएका खड्काले सचिव पदमा आफू सक्षम, योग्य र अनुभवी उम्मेदवार भएको स्पष्ट पारेका छन् । उनले भने, “मैले विद्यार्थीको हकहितका लागि निरन्तर संघर्ष गर्दै आएको छु, सचिव पदमा रहेर यो संघर्षलाई अझ प्रभावकारी बनाउने अठोटका साथ मैदानमा उत्रिएको हुँ।”

खड्काले विगतमा विभिन्न चरणमा अनेरास्ववियुको जिल्ला, प्रदेश र केन्द्रीय तहका अभियानहरूमा नेतृत्वदायी भूमिका निर्वाह गरेका छन् । विद्यालय तहदेखि नै विद्यार्थी आन्दोलनमा सक्रिय रहेका उनले शिक्षामा समावेशी पहुँच, निःशुल्क तथा गुणस्तरीय शिक्षाको सवालमा निरन्तर आवाज उठाउँदै आएका छन् ।

दोलखाबाट अनेरास्ववियुको स्थायी सदस्य हुँदै हालसम्मको यात्रा तय गरेका खड्का पहिलादेखिको नेतृत्व, सङ्गठन निर्माणमा भूमिका तथा नीतिगत बहसहरूमा समेत अग्रसर रहँदै आएका छन् । उनले संगठनभित्रको लोकतान्त्रिक अभ्यास सुदृढ गर्दै विद्यार्थीको आवाज नीतिनिर्माण तहसम्म पुर्याउने आफ्नो लक्ष्य रहेको बताएका छन् ।

महाधिवेशनको क्रममा उनले सबै प्रतिनिधिहरूलाई सहयोगी बन्न आग्रह गरेका छन् । “यो महाधिवेशनले नेतृत्व चयन मात्र होइन, विचारको लडाइँ पनि हो । म विद्यार्थी आन्दोलनप्रति इमान्दार छु र सदैव विद्यार्थीको हक, अधिकारीको पक्षमा उभिइरहने छु,” खड्काले प्रतिनिधिहरू समक्ष अपिल गरे ।

दोलखाबाट जनसंपर्क, संगठन विस्तार र स्थानीय तहसम्मको विद्यार्थी सवालमा सक्रिय रहेका खड्कालाई प्रतिनिधिहरूको समर्थन रहेको बुझिएको छ । उनी सचिव पदका लागि बलियो प्रतिस्पर्धीका रूपमा उभिएका छन् ।

त्यसैगरी, अनेरास्ववियुको महाधिवेशन जेठ २८ गतेसम्म काठमाडौंमा जारी रहनेछ ।